وه کوو نه ی کوون کوونه جه رگم له تاو هیجرانی تۆ بۆیه

به سۆزی نه ی ده سوتێم و به نه غمه ی نه ی ده ناڵێنم

ئه مان ئه ی موتریبی مه جلیس به حه قی تاری ڕووحانیت

بڵا بێ نه غـمه که ی سازت، کــه ئـاوی ئـاوری هـیجرانه

ئه تۆ ئه ی ڕوحه که م ساقی ئه تۆ ئه ی عومره که م موتریب

په یاپه ی لــێ ده چـه نــگ و نـه ی ده مـاده م بێـنه پـه یـمانه

به تیـــری غـه مـزه بمــلاوێـنه وا زوڵـفم لـه گه ردن که

به سه ر هاتوومه ، مه یدانت به دڵ بۆت بوومه نیشانه

ده مێکی مه ست و بیمارم ، ده مێک بێ هۆش و هۆشیارم

چ کـه س نازانـێ ده ردی من ، مه گـه ر ئه و چاوه کاڵانه

هه ناسه ی ئاشقان با نه ت گرێ بێ مروه تی تا که ی؟

بتـرسێ ئه ی گوڵـی ناسک به ده ن لــه و بـایی زریـانه

ئه گه ر زوڵفت وه کوو من ئاشقی ڕووی تۆ نییه بۆچی !

سه را پا تێک چووه که وتـۆته به ر پێـت ده ست دامانه

"وه فایی" بــۆ گـوڵێکی سه ر و بـاڵا شێـت و شـه یدایه

وه کوو قومری ده ناڵێنێ، وه کوو بولبل غه زه ل خوانه

"وه فایی" 

ئەمساڵ بێ چیا نەورۆز ناکەم،
بێ بۆنی گیا نەورۆز ناکەم،
نەورۆز ناکەم،
بێ بڵێسەی سووری ئاگر.
گەر ڕەشبەڵەک تۆز نەکات و
بۆخۆم نەبمە سەرچۆپیگر.

کزەی جەرگم،
بەیانی زوو هەڵمسێنە
زۆر دەترسم،
کەوێک، کارێک،
گوندێک، شارێک،
چەمێک، چیایەک،
لە بیر بکەم.
زۆر دەترسم،
دارێک، بەردێک،
کۆختێک، گەردێک،
پنجە گیایەک،
لە بیر بکەم.

بەیانی زوو هەڵمسێنە،
دیسان مەڵێ با تێرخەو بێ،
سوێندم بە چیا خواردووە،
کە کوردستانە دوورەکەم،
بە گەرمێن و کوێستانەوه،
بگوازمەوە بۆ غەریبی،
بۆ ژوورەکەم...

"پەشێو"

ئەگەر باڵدار بم، یەک باڵم
ئەگەر بەڕوو، ئەگەر قەڵەم،
یان کڵاوکوڕەی شێعریش بم،
بێکڵاوم.
گەر ئەسپ بم،
خاوەنی تاقه یەک چاوم
ئەگەر با بم بێ گڤەم و
ئەگەر ئاو بم بێ خوڕەم و
ئەگەر هەنگوینی وشەش بم،
لەناو زاری ئازادیمدا،
تفت تفت و هەر بێتامم.
من کوت و مت بەبێ کەرکووک،
مرۆڤێکی کەمەندامم.

"شێرکۆ بێکەس"

نیوەشەوێ،
لەبن ڕێژنەی،
هەودای تەزوو و برووسکەدا،
ژوانم هەیه.
که دەیگەمێ،
لەپی دەستێک،
بۆ ناو تۆفان گەمیەم دەبێ.
بەژنێک شێعر و تریفه و بۆن،
تێم دەئاڵێ.
کۆشێک داڵدەی هەنیەم دەبێ.
بۆ دوودڵم؟
ئەگەر نەچم،
کێ دەزانێ،
لەم عومره کورتەی که ماوه،
کەنگێ دیسان ژوانم دەبێ؟
کێ دەزانێ،
کەی شێتی باڵم پێ دەگرێ و
جارێکی تر دەرفەتی سووتانم دەبێ؟

"پەشێو"